ଭାରତରେ ବଡ ସୁନାଖଣି ଠାବ। ରାଜସ୍ତାନର ଆଦିବାସୀ ବହୁଳ ଜିଲ୍ଲା ବାଂସୱାଡାରେ ଲଗାତର ତୃତୀୟ ବର୍ଷ ପାଇଁ ଗୋଲ୍ଡ ମାଇନର ଆବିସ୍କାର ହୋଇଛି ।ଭୂତାତ୍ତ୍ୱିକ ସର୍ବେକ୍ଷଣ ଜିଏସଆଇ ଦ୍ୱାରା କରାଯାଇଥିବା ତଦନ୍ତରେ କାଙ୍କରିଆ ଅଞ୍ଚଳରେ ସୁନା ଖଣି ଠାବ ହୋଇଛି । ଚାରୋଟି ଗାଁକୁ ଘେରି ରହିଥିବା ୩ କିଲୋମିଟର ଅଞ୍ଚଳରେ ପ୍ରାୟ ୧.୨୦ ଟନ ସୁନା ଆକଳନ କରାଯାଇଛି । କେବଳ ସୁନା ନୁହେଁ ତମ୍ବା, କୋବାଲ୍ଟ ଏବଂ ଅନ୍ୟାନ୍ୟ ବସ୍ତୁ ଗଚ୍ଛିତ ଥିବା ସୂଚନା ମିଳିଛି । ଜିଏସଆଇର ତଦନ୍ତ ପରେ ସରକାର ଏବେ ଏହି ଅଞ୍ଚଳରେ ପୁଙ୍ଖାନୁପୁଙ୍ଖ ସର୍ଭେ କରିବାକୁ ନିଷ୍ପତ୍ତି ନେଇଛନ୍ତି । ଆସନ୍ତା ନଭେମ୍ବର ୩ ତାରିଖରେ ସର୍ବାଧିକ ବିଡରଙ୍କୁ କ୍ଷେତ୍ର ସର୍ଭେ କରିବା ପାଇଁ ଲାଇସେନ୍ସ ପ୍ରଦାନ କରାଯିବ ।କାଙ୍କରିଆ, ଡେଲୱାରା ରାବଣା, ଡେଲୱାରା ଏବଂ ଡୁଙ୍ଗରିଆପଡାରେ ତଦନ୍ତ କରାଯିବ ବୋଲି କୁହାଯାଇଛି । ପ୍ରାୟ ତିନି ବର୍ଷ ମଧ୍ୟରେ ସର୍ଭେ କାମ ସମାପ୍ତ ହେବ ବୋଲି ଆଶା କରାଯାଉଛି । ଜିଏସଆଇ ଦ୍ୱାରା ପ୍ରାରମ୍ଭିକ ତଦନ୍ତରେ ୧.୨୦ ଟନ ସୁନା, ହଜାରେ ଟନ ତମ୍ବା ଏବଂ କୋବାଲ୍ଟ ଥିବା ଅନୁମାନ କରାଯାଉଛି ।ସୂଚନା ଅନୁସାରେ GSI ବାଂସୱାଡ଼ାର ଭୁକିଆ ଏବଂ ଜଗପୁରା ଅଞ୍ଚଳରେ ୧୧୪.୮ ନିୟୁତ ଟନ୍ ସୁନା ଖଣି ଆବିଷ୍କାର କରିଥିଲା । ତଥାପି ଏହି ସ୍ଥାନରେ ଏପର୍ଯ୍ୟନ୍ତ କାର୍ଯ୍ୟ ଆରମ୍ଭ ହୋଇନାହିଁ । ବାଂସୱାଡ଼ାରେ ଆନୁମାନିକ ସୁନା ଖଣି ସହିତ ରାଜସ୍ଥାନ ନିରନ୍ତର ସୁନା ଉତ୍ପାଦନ କରିବାରେ ଦେଶର ଦ୍ୱିତୀୟ ରାଜ୍ୟ ହେବ । ଏହା ରାଜସ୍ଥାନକୁ ଦେଶର ୨୫ ପ୍ରତିଶତରୁ ଅଧିକ ସୁନା ଅଂଶ ଦେବ । ବର୍ତ୍ତମାନ କର୍ଣ୍ଣାଟକର ହୁଟି ଏବଂ କୋଲାର ଖଣିରୁ ସୁନା ଖନନ କରାଯାଉଛି । ରାଜସ୍ଥାନର ବାଂସୱାଡ଼ା ଆରାବତୀ ପର୍ବତମାଳାରେ ଅବସ୍ଥିତ । ଏଠାକାର ଭୌଗୋଳିକ ପଥର ୫,୦୦୦ ବର୍ଷରୁ ଅଧିକ ପୁରୁଣା । ବାଂସୱାଡ଼ାରେ ମାର୍ବଲ ମଧ୍ୟ ଖନନ କରାଯାଏ । ଏବେ ସୁନା ଖଣି ଆବିଷ୍କାର ହେବା ସହିତ ଅଞ୍ଚଳରେ ନିଯୁକ୍ତି ସୁଯୋଗ ବୃଦ୍ଧି ପାଇବ ବୋଲି ସ୍ଥାନୀୟ ଲୋକଙ୍କର ଆଶା ରହିଛି ।
