ମଙ୍ଗଳବାର ରାତିରେ ଇନ୍ଦୋରର ଦେବୀ ଅହଲ୍ୟାବାଇ ହୋଲକର ବିମାନବନ୍ଦରରେ ଏକ ଆଶ୍ଚର୍ଯ୍ୟଜନକ ଘଟଣା ଘଟିଛି। ରାଜା ରଘୁବଂଶୀ ହତ୍ୟା ମାମଲାରେ ଗିରଫ ହୋଇଥିବା ଜଣେ ଅଭିଯୁକ୍ତଙ୍କୁ ସେଠାରେ ଉପସ୍ଥିତ ଥିବା ଜଣେ ବ୍ୟକ୍ତି ଚାପୁଡ଼ା ମାରିଥିଲେ।ଏହି ସମସ୍ତ ଘଟଣା ପୋଲିସ ଏବଂ ଗଣମାଧ୍ୟମ ଉପସ୍ଥିତିରେ ହିଁ ଘଟିଥିବା ଖବର ମିଳୁଛି । ସେହି ଭିଡିଓ ଖୁବ୍ ଜୋରରେ ସୋସିଆଲ ମିଡିଆରେ ଭାଇରଲ ହେବାରେ ଲାଗିଛି । ସୂଚନାମୁତାବକ ମେଘାଳୟ ପୋଲିସ ଦଳ ଚାରି ଜଣ ଅଭିଯୁକ୍ତଙ୍କୁ ନେଇ ବିମାନବନ୍ଦର ଭିତରକୁ ଯାଉଥିବା ସମୟରେ ଏହି ଘଟଣା ଘଟିଥିଲା। ସେହି ସମୟରେ, ତାଙ୍କ ଲଗେଜ ସହିତ ଠିଆ ହୋଇଥିବା ଜଣେ ଯାତ୍ରୀ ହଠାତ୍ ଅଭିଯୁକ୍ତଙ୍କ ମଧ୍ୟରୁ ଜଣଙ୍କୁ ସେହି ବାଟ ଦେଇ ଯାଉଥିବା ଦେଖି ଚାପୁଡ଼ା ମାରି ଦେଇଥିଲେ। ହତ୍ୟା ଉପରେ ଅସନ୍ତୋଷ ପ୍ରକାଶ କରିବା ପାଇଁ ସେ ଏପରି କରିଥିବା ବିଶ୍ୱାସ କରାଯାଉଛି।
