ଭାରତର ପ୍ରଥମ ଭର୍ଟିକାଲ୍ ଲିଫ୍ଟ ବ୍ରିଜ୍ର ନିର୍ମାଣ ଶେଷ । ସମୁଦ୍ର ଭିତରେ ଏହି ବ୍ରିଜ୍ ତିଆରି ହୋଇଛି । ଆସନ୍ତା ଏପ୍ରିଲ ୬ ତାରିଖ ଅର୍ଥାତ୍ ରାମନବମୀରେ ପମ୍ବନ ବ୍ରିଜ୍କୁ ଉଦଘାଟନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ତେବେ ପରୀକ୍ଷଣ ସଫଳ ସମ୍ପର୍କରେ ଘୋଷଣା କରାଯାଇଛି। ପମ୍ବନ ପୋଲରେ ରେଲୱେ, ତଟରଖୀ, ରାଜ୍ୟ ପ୍ରଶାସନିକ ଅଧିକାରୀ ଏବଂ ପୋଲିସର ଉପସ୍ଥିତିରେ ୨୯ ମାର୍ଚ୍ଚରେ ପୋଲ ଖୋଲିବା ପୂର୍ବାଭ୍ୟାସ ପରୀକ୍ଷଣ ସମ୍ପନ୍ନ ହୋଇଥିଲା।
ପୁରୁଣା ପମ୍ବନ ପୋଲର ସେଝର ନିକଟରେ ମଧ୍ୟ ତଟରଖି ଜାହାଜର ଚଳାଚଳ ସ୍ଥିତିକୁ ମଧ୍ୟ ପରଖାଯାଇଛି। ଉଭୟ ପଟୁ ଯେପରି ଏହି ଜାହାଜ ଗୁଡ଼ିକ ସହଜରେ ଯାତ୍ରା କରିବ ତାର ବିସ୍ତୃତ ଦିଗ ଉପରେ ପରୀକ୍ଷଣ କରାଯାଇଥିଲା। ସେହିଭଳି ଟ୍ରେନ ଚଳାଚଳ କରାଯାଇ ଏହାର ସମୟକୁ ମଧ୍ୟ ବିଚାର କରାଯାଇଥିଲା। ଏହି ପରୀକ୍ଷଣ ସଫଳ ହୋଇଥିବା କର୍ତ୍ତୃପକ୍ଷ ସୂଚନା ଦେଇଛନ୍ତି।ସମୁଦ୍ର ଯାତାୟାତକୁ ସୁଗମ କରିବା ପାଇଁ ପୋଲ ଉପରେ ରେଲଓ୍ବେ ଟ୍ରାକ୍ର ଗୋଟିଏ ଅଂଶ ଅର୍ଥାତ୍ ୧୭ ମିଟର ଉପରକୁ ଉଠିପାରିବ । ଫଳରେ ଜାହାଜ ଗୁଡ଼ିକ ସହଜରେ ଯାଆସ କରିପାରିବେ । ନୂଆ ପମ୍ବନ ବ୍ରିଜର ଲିଫ୍ଟ ମାତ୍ର ୫ ମିନିଟ ୩୦ ସେକେଣ୍ଡରେ ଖୋଲିବ । ମାତ୍ର ପୁରୁଣା ପୋଲରେ ଏହା ଖୋଲିବାକୁ ୩୫ ମିନିଟ୍ ୪୦ ସେକେଣ୍ଡ ଲାଗୁଥିଲା । ନୂଆ ବ୍ରିଜରେ ରେଳ ଚଳାଚଳ କଲେ ବହୁ ସମୟ ବଞ୍ଚିବ । ପୋଲକୁ ହାଇ-କ୍ବାଲିଟି ଏବଂ ଟେକ୍ନୋଲଜି ବ୍ୟବହାର କରି ନିର୍ମାଣ କରାଯାଇଛି । ସମୁଦ୍ରର ପ୍ରତିକୂଳ ପରିସ୍ଥିତି ଓ ପବନକୁ ଦୃଷ୍ଟିରେ ରଖି ଏହି ବ୍ରିଜକୁ ନିର୍ମାଣ କରାଯାଇଛି ।
