ବିଶ୍ବର ୯ଟି ଦେଶ ନିକଟରେ ୧୨ ହଜାରରୁ ଅଧିକ ପରମାଣୁ ଅସ୍ତ୍ର ରହିଥିବା ଦି ଷ୍ଟକ୍ହୋମ ଇଣ୍ଟରନ୍ୟାସନାଲ୍ ପିସ୍ ରିସର୍ଚ୍ଚ ଇନ୍ଷ୍ଟିଚ୍ୟୁଟ୍ (ଏସ୍ଆଇପିଆରଆଇ) ତରଫରୁ ଜାରି ଏକ ରିପୋର୍ଟରେ ଦର୍ଶାଯାଇଛି। ତେହରାନର ପରମାଣୁ କାର୍ଯ୍ୟକ୍ରମକୁ ନେଇ ଇସ୍ରାଏଲ ଓ ଇରାନ ମଧ୍ୟରେ ଯୁଦ୍ଧ ସ୍ଥିତି ଲାଗି ରହିଥିବା ସମୟରେ ଏସ୍ଆଇପିଆରଆଇ ତରଫରୁ ଏହି ରିପୋର୍ଟ ଜାରି କରାଯାଇଛି। ଭାରତ ପାଖରେ ୧୮୦, ପାକିସ୍ତାନ ପାଖରେ ୧୭୦ ଏବଂ ଚୀନ୍ ପାଖରେ ୬୦୦ ପରମାଣୁ ଅସ୍ତ୍ର ଅଛି। ଚୀନ୍ ଦ୍ରୁତ ଗତିରେ ଏହାର ଅସ୍ତ୍ରାଗାର ବୃଦ୍ଧି କରୁଛି, ଯେତେବେଳେ ଆମେରିକା ଏବଂ ରୁଷ ପୁରୁଣା ଅସ୍ତ୍ରଗୁଡ଼ିକୁ ନଷ୍ଟ କରୁଛନ୍ତି।
ଭାରତ ପାଖରେ ପାକିସ୍ତାନ ଅପେକ୍ଷା ଅଧିକ ପରମାଣୁ ଅସ୍ତ୍ର ଅଛି, ଯେତେବେଳେ ଚୀନ୍ ପାଖରେ ଭାରତ ଅପେକ୍ଷା ତିନି ଗୁଣ ଅଧିକ ଅସ୍ତ୍ର ଅଛି। ରିପୋର୍ଟରେ କୁହାଯାଇଛି ଯେ ପ୍ରାୟ ସମସ୍ତ ନଅଟି ପରମାଣୁ ଅସ୍ତ୍ରଶସ୍ତ୍ର ସମ୍ପନ୍ନ ଦେଶ – ଆମେରିକା, ରୁଷ, ୟୁକେ, ଫ୍ରାନ୍ସ, ଚୀନ୍, ଭାରତ, ପାକିସ୍ତାନ, ଉତ୍ତର କୋରିଆ ଏବଂ ଇସ୍ରାଏଲ – ୨୦୨୪ ମସିହାରେ ସେମାନଙ୍କର ଘନିଷ୍ଠ ପରମାଣୁ ଆଧୁନିକୀକରଣ କାର୍ଯ୍ୟକ୍ରମ ଜାରି ରଖିଛନ୍ତି, ବିଦ୍ୟମାନ ଅସ୍ତ୍ରଶସ୍ତ୍ରକୁ ଅପଗ୍ରେଡ୍ କରିଛନ୍ତି ଏବଂ ନୂତନ ସଂସ୍କରଣ ଯୋଡିଛନ୍ତି। ଗତ ଜାନୁଆରୀ ୧ ସୁଦ୍ଧା ୯ଟି ଦେଶ ନିକଟରେ ୧୨୨୪୧ଟି ପରମାଣୁ ଅସ୍ତ୍ର ରହିଥିବା ବେଳେ ସେଥିମଧ୍ୟରୁ ୩୯୧୨ଟି ପରମାଣୁ ଅସ୍ତ୍ର ବିଭିନ୍ନ କ୍ଷେପଣାସ୍ତ୍ର ଓ ଯୁଦ୍ଧବିମାନରେ ଖଞ୍ଜା ଯାଇଥିବା ରିପୋର୍ଟରେ ଦର୍ଶାଯାଇଛି। ଅନ୍ୟପକ୍ଷରେ ଚୀନ ଅନ୍ୟ ଦେଶଙ୍କ ତୁଳନାରେ ଅଧିକ ପରମାଣୁ ଅସ୍ତ୍ର ପ୍ରସ୍ତୁତ କରୁଥିବା ରିପୋର୍ଟରୁ ଜଣାପଡ଼ିଛି। ୨୦୨୩ରୁ ବର୍ତ୍ତମାନ ପର୍ଯ୍ୟନ୍ତ ରୁଷ ବିପୁଳ ପରିମାଣର ପରମାଣୁ ଅସ୍ତ୍ର ପ୍ରସ୍ତୁତ କରି ସାରିଥିବା ଏଥିରେ ଦର୍ଶାଯାଇଛି। ରୁଷ ଓ ଆମେରିକା ନିକଟରେ ବିଶ୍ବର ପ୍ରାୟ ୯୦% ପରମାଣୁ ଅସ୍ତ୍ର ଅଛି |
