ଆଗାମୀ ଗ୍ରୀଷ୍ମ ଋତୁରେ ମହଙ୍ଗା ହୋଇପାରେ ପିଆଜ! ଗ୍ରୀଷ୍ମ ଋତୁରେ ପିଆଜର ଚାହିଦା ବୃଦ୍ଧି ପାଏ, ତେଣୁ ଏହାର ଯୋଗାଣ ଏବଂ ମୂଲ୍ୟକୁ ନିୟନ୍ତ୍ରଣରେ ରଖିବା ଗୁରୁତ୍ୱପୂର୍ଣ୍ଣ। ପିଆଜ ଉପରେ ଥିବା ୨୦ ପ୍ରତିଶତ ରପ୍ତାନି ଶୁଳ୍କକୁ ଶନିବାର କେନ୍ଦ୍ର ସରକାର ହଟାଇ ଦେଇଛନ୍ତି। ଏହାଦ୍ବାରା ପିଆଜ ଚାଷୀ ଓ ରପ୍ତାନିକାରୀ ଆଶ୍ବସ୍ତି ପାଇବେ। କାରଣ ଦେଶରେ ପିଆଜ ମହଜୁଦ ପରିମାଣ ବଢ଼ିବା ଓ ଦର ହ୍ରାସ ପାଇଥିବାରୁ ରପ୍ତାନି ଶୁଳ୍କ ହଟାଇବା ପାଇଁ ଚାଷୀ ଓ ରପ୍ତାନିକାରୀ ଦାବି କରିଥିଲେ। ଏହା ଏପ୍ରିଲ ୧ରୁ କାର୍ଯ୍ୟକାରୀ ହେବ ବୋଲି ରାଜସ୍ବ ବିଭାଗ ବିଜ୍ଞପ୍ତି ଜାରି କରିଛି।ଗ୍ରାହକ ବ୍ୟାପାର ମନ୍ତ୍ରଣାଳୟ କହିଛି, “ପିଆଜ ଚାଷୀମାନଙ୍କୁ ସେମାନଙ୍କ ଉତ୍ପାଦ ଉପରେ ଲାଭ ଦେବା ପାଇଁ ଏହି ନିଷ୍ପତ୍ତି ନିଆଯାଇଛି।
ଏହା ସହିତ, ସାଧାରଣ ଗ୍ରାହକଙ୍କ ପାଇଁ ପିଆଜର ଉଚିତ ମୂଲ୍ୟ ବଜାୟ ରଖିବା ପ୍ରତି ସରକାରଙ୍କ ପ୍ରତିବଦ୍ଧତାକୁ ଦର୍ଶାଉଛି। ରବି ଫସଲ ସମୟରେ ପିଆଜର ଭଲ ଆଗମନ ଆଶା କରାଯାଉଛି। ତେଣୁ, ପିଆଜର ପାଇକାରୀ ଏବଂ ଖୁଚୁରା ମୂଲ୍ୟ ହ୍ରାସ ପାଇଛି। ବିଶ୍ୱ ବଜାରରେ ଭାରତ ଏହାର ବଜାର ଅଂଶ ହରାଇବା ଏବଂ ଗତ ତିନି ସପ୍ତାହ ମଧ୍ୟରେ ହାରାହାରି ମୂଲ୍ୟ ୨,୨୭୦ ଟଙ୍କା ପ୍ରତି କ୍ୱିଣ୍ଟାଲରୁ ୧,୪୨୦ ଟଙ୍କାକୁ ହ୍ରାସ ପାଇବା ପରେ ବ୍ୟବସାୟୀଙ୍କ ମଧ୍ୟରେ ଚିନ୍ତା ବଢ଼ିବାରୁ ରପ୍ତାନି ଶୁଳ୍କ ବାତିଲ କରାଯାଇଛି।
