ରାତି ଅଧରେ ଖଳାରୁ ଧାନ ଚୋରି କରି ଚମ୍ପଟ ମାରିବାକୁ ଉଦ୍ୟମ କରୁଥିଲେ ଚୋର। ହେଲେ ଗ୍ରାମବାସୀଙ୍କ ହାବୁଡ଼ରେ ପଡ଼ିଗଲେ। ଚୋରମାନଙ୍କୁ କାବୁ କରି ପୁଲିସ ଜିମାରେ ଦେଇଛନ୍ତି ଗ୍ରାମବାସୀ। ଅଭିଯୁକ୍ତଙ୍କ ମଧ୍ୟରେ ୪ ଜଣ ନାବାଳକ ରହିଛନ୍ତି । ସମସ୍ତ ଅଭିଯୁକ୍ତ ସମ୍ବଲପୁର ଯୁଯୁମରା ଅଞ୍ଚଳର ହୋଇଥିବା ସୂଚନା ମିଳିଛି । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ କରୁଛି । ସୂଚନାମୁତାବକ ଚାଷୀମାନେ କ୍ଷେତରୁ ଧାନ ଆଣି ଅମଳକରି ତାକୁ ଖଳାରେ ରଖିଛନ୍ତି। ଗତକାଲି ରାତିରେ ୮ ଜଣ ଚୋର ଏକ ମିନି ଟ୍ରକ୍ ଆଣି ଖଳାରେ ଥିବା ଧାନକୁ ଗାଡ଼ିରେ ଲଦି ନେବାକୁ ଉଦ୍ୟମ କରୁଥିଲେ। ଏହି ସମୟରେ ସେମାନେ ଗ୍ରାମବାସୀଙ୍କ ହାବୁଡ଼ରେ ପଡ଼ି ଯାଇଥିଲେ। ଗ୍ରାମବାସୀ ଚୋରମାନଙ୍କୁ କାବୁ କରିଥିଲେ ଓ ପୁଲିସକୁ ଖବର ଦେଇଥିଲେ। ପୁଲିସ ଚୋରମାନଙ୍କୁ ନିଜ ହେପାଜତକୁ ପଚରାଉଚରା କରିବା ସହ ଟ୍ରକକୁ ଜବତ କରିଛି।
