ଗୁଜରାଟର ସୁରଟ୍ ସିଭିଲ୍ ହସ୍ପିଟାଲରେ ଏକ ଚମତ୍କାର ଘଟଣା ଘଟିଛି । ଯେଉଁଠାରେ ଡାକ୍ତରମାନେ ଅଙ୍କଲେଶ୍ୱରର ବାସିନ୍ଦା ରାଜେଶ ପଟେଲଙ୍କୁ ମୃତ ଘୋଷଣା କରିଥିଲେ, ଇସିଜିରେ ଷ୍ଟାଟ ଲାଇନ ଦେଖାଯିବାର ୧୫ ମିନିଟ୍ ମଧ୍ୟରେ ତାଙ୍କ ହୃଦୟ ହଠାତ୍ ଧଡ଼ଧଡ଼ କରିବାକୁ ଲାଗିଲା। ଡାକ୍ତରମାନେ ତୁରନ୍ତ ତାଙ୍କୁ ଆଇସିୟୁରେ ଭର୍ତ୍ତି କରିଥିଲେ। ତାଙ୍କ ଅବସ୍ଥା ବର୍ତ୍ତମାନ ସ୍ଥିର ଥିବା ଜଣାପଡ଼ିଛି। ଏହା ଚିକିତ୍ସା ବିଜ୍ଞାନ ଏବଂ ସାଧାରଣ ଲୋକଙ୍କୁ ଆଶ୍ଚର୍ଯ୍ୟ କରିଦେଇଛି।ଅଙ୍କଲେଶ୍ୱରର ବାସିନ୍ଦା ୪୫ ବର୍ଷୀୟ ରାଜେଶ ପଟେଲଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବା ପରେ ତାଙ୍କୁ ସୁରଟର ନୂତନ ସିଭିଲ୍ ହସ୍ପିଟାଲକୁ ଅଣାଯାଇଥିଲା। ଡାକ୍ତରମାନେ ରିପୋର୍ଟ କରିଥିଲେ ଯେ ରୋଗୀ ଗୁରୁତର ହୃଦଘାତରେ ପୀଡିତ ଥିଲେ ଏବଂ ତାଙ୍କ ଅବସ୍ଥା କ୍ରମାଗତ ଭାବରେ ଖରାପ ହେଉଥିଲା । ଡାକ୍ତରୀ ଟିମ ଯଥାସମ୍ଭବ ଚେଷ୍ଟା କରିଥିଲେ, କିନ୍ତୁ ଇସିଜି ରିପୋର୍ଟରେ “ଷ୍ଟେଟ୍ ଲାଇନ” ଦେଖାଯିବା ପରେ, ରୋଗୀଙ୍କୁ ମୃତ ଘୋଷଣା କରାଯାଇଥିଲା । ହସ୍ପିଟାଲରେ ଉପସ୍ଥିତ ପରିବାର ସଦସ୍ୟମାନେ କାନ୍ଦିବାକୁ ଲାଗିଲେ ।
ଆଉ ଠିକ ଏହି ଘୋଷଣାର ପ୍ରାୟ ୧୫ ମିନିଟ୍ ପରେ, ଏପରି କିଛି ଘଟିଲା ଯାହା ସମସ୍ତଙ୍କୁ ହତବାକ୍ କରିଦେଲା । ରୋଗୀଙ୍କ ଶରୀରରେ ସାମାନ୍ୟ ଗତି ପରିଲକ୍ଷିତ ହେଲା, କ୍ଷଣିକରେ ହଠାତ୍ ହୃଦସ୍ପନ୍ଦନ ହେଲା । ଡାକ୍ତରମାନେ ଆଶ୍ଚର୍ଯ୍ୟ ହୋଇଗଲେ ଆଉ ରୋଗୀକୁ ପୁଣି ଥରେ ଆଇସିୟୁକୁ ସ୍ଥାନାନ୍ତର କରାଗଲା । ଟିମ ଜରୁରୀକାଳୀନ ଚିକିତ୍ସା ଆରମ୍ଭ କଲେ ଓ ଧୀରେ ଧୀରେ ରୋଗୀଙ୍କ ହୃଦସ୍ପନ୍ଦନ ସ୍ୱାଭାବିକ ହୋଇଗଲା। ହସ୍ପିଟାଲର ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ଉମେଶ ଚୌଧୁରୀ କହିଛନ୍ତି, “ମୋର ୩୦ ବର୍ଷର କ୍ୟାରିୟରରେ ଏହା ପ୍ରଥମ ଥର ଯେ ଜଣେ ରୋଗୀଙ୍କୁ ମୃତ ଘୋଷଣା କରାଯାଇଛି ଏବଂ ତା’ପରେ ସେ ନିଜେ ପୁନର୍ଜୀବିତ ହୋଇଛନ୍ତି । ଆମେ ଅନେକ ଥର ହୃଦଘାତ ରୋଗୀଙ୍କୁ ସିପିଆର ଦେଇଛୁ, କିନ୍ତୁ କିଛି ନକରି ହୃଦୟ ନିଜେ ସ୍ପନ୍ଦନ କରିବା ଘଟଣା ବହୁତ କମ୍। କର୍ତ୍ତୃପକ୍ଷ କହିଛନ୍ତି ଯେ ରୋଗୀଙ୍କ ଅବସ୍ଥା ବର୍ତ୍ତମାନ ସ୍ଥିର ଅଛି । ତେବେ ଏଭଳି ଘଟଣା କେବଳ ରାଜେଶଙ୍କ ପରିବାର ଲୋକ ନୁହନ୍ତି ଡାକ୍ତରଖାନା ସାରା ସମସ୍ତଙ୍କୁ ବିସ୍ବିତ ଚକିତ କରି ଦେଇଛି । ସେମାନେ ବି ଏହାକୁ ଚମତ୍କାର ବୋଲି ମାନୁଛନ୍ତି ।