ପ୍ରଥମ ଚୟନ ପାଠ୍ୟକ୍ରମ ପରିସଂଖ୍ୟାନ ରିପୋର୍ଟ ଉଚ୍ଚଶିକ୍ଷା ବିଭାଗ ପକ୍ଷରୁ ପ୍ରକାଶ ପାଇଛି । ପ୍ରଥମ ଚୟନ ୟୁ.ଜି. ପାଠ୍ୟକ୍ରମରେ ପର୍ଯ୍ୟାୟ-୧ ପ୍ରବେଶର ମେଧା ତାଲିକା ଆଜି ପୂର୍ବାହ୍ନ ୧୧.୦୦ ଟାରେ ପ୍ରକାଶିତ ହୋଇଛି।ସୂଚନା ଅନୁସାରେ ୟୁ.ଜି. ର ମୋଟ ମଞ୍ଜୁରୀପ୍ରାପ୍ତ ଆସନ ସଂଖ୍ୟା ୨,୭୪,୫୦୯ ରହିଛି । ଚଳିତ ବର୍ଷ ଆବେଦନ କରିଥିବା ମୋଟ ଛାତ୍ରଛାତ୍ରୀ ସଂଖ୍ୟା ୨,୬୫,୫୯୦ ଥିବା ବେଳେ ମନୋନୀତ ଛାତ୍ରଙ୍କ ସଂଖ୍ୟା ୧,୭୫,୭୨୨ ରହିଛି । ମୋଟ ପୁରୁଷ ମନୋନୀତ ସଂଖ୍ୟା ୭୦,୭୪୫ ମହିଳା ମନୋନୀତ ସଂଖ୍ୟା ୧,୦୪,୯୬୭ ରହିଛି । ଟ୍ରାନ୍ସଜେଣ୍ଡର ମନୋନୀତ ୧୦ ରହିଛି ।ରାଜନୀତି ବିଜ୍ଞାନରେ ସର୍ବାଧିକ ୯୨.୮୦% କଟ୍ଅଫ୍ ମାର୍କ ରହିଥିବା ବେଳେ ପ୍ରାଣୀ ବିଜ୍ଞାନରେ ୯୪%, ପଦାର୍ଥ ବିଜ୍ଞାନରେ ୯୩.୬୭%, ବାଣିଜ୍ୟରେ ୯୦.୫୦ ପ୍ରତିଶତ କଟ୍ଅଫ୍ ମାର୍କ ରହିଛି।ସୂଚନା ଥାଉକି, ପ୍ରଥମ ପର୍ଯ୍ୟାୟରେ ୪ଟି ରାଉଣ୍ଡ୍ରେ ନାମ ଲେଖାଯିବ।
ଏଥିପାଇଁ ଚୟନ ହୋଇଥିବା ଛାତ୍ରୀଛାତ୍ର ୧୨ରୁ ୧୭ତାରିଖ ମଧ୍ୟରେ ନାମଲେଖା ଫି’ ଜମା କରିବା ସହ ନାମଲେଖାଇ ପାରିବେ। ଦ୍ୱିତୀୟ ପର୍ଯ୍ୟାୟ ମେଧା ତାଲିକା ୨୨ ତାରିଖରେ ପ୍ରକାଶ ପାଇବ। ଏହି ପର୍ଯ୍ୟାୟରେ ଚୟନ ହୋଇଥିବା ଛାତ୍ରୀଛାତ୍ର ୨୫ ତାରିଖ ମଧ୍ୟରେ ଫି’ ଜମା କରି ନାମଲେଖାଇ ପାରିବେ। ସେହିପରି ଜୁଲାଇ ୧ରେ ତୃତୀୟ ପର୍ଯ୍ୟାୟ ନାମଲେଖା ପାଇଁ ମେଧା ତାଲିକା ପ୍ରକାଶ ପାଇବ ଓ ଚୟନ ହୋଇଥିବା ଛାତ୍ରୀଛାତ୍ର ୪ ତାରିଖ ସୁଦ୍ଧା ନାମଲେଖା ଫି’ ଜମା ସହ ନାମଲେଖାଇବେ। ଏହାପରେ ବଳକା ସିଟ୍ରେ ନାମଲେଖା ପାଇଁ ଚତୁର୍ଥ ପର୍ଯ୍ୟାୟ ଆବେଦନ ହେବ। ଏଥିପାଇଁ ପିଲାମାନେ ଜୁଲାଇ ୭ରୁ ୧୦ ତାରିଖ ମଧ୍ୟରେ ଅନ୍ଲାଇନ୍ ଆବେଦନ କରିବେ। ୧୨ ତାରିଖରେ ଇ-ସ୍ପେସ୍ରେ ମେଧା ତାଲିକା ପ୍ରକାଶ ପାଇବ ଓ ୧୩ ତାରିଖରେ ଚୟନ ହୋଇଥିବା ଉଚ୍ଚଶିକ୍ଷାନୁଷ୍ଠାନର ନୋଟିସ୍ ବୋର୍ଡରେ ତାଲିକା ପ୍ରକାଶ ପାଇବ। ସେମାନେ ୧୪ରେ ନାମଲେଖା ଫି’ ଜମା କରିବା ସହ ୧୫ରେ ନାମଲେଖାଇବେ।
