ଉତ୍ତରପ୍ରଦେଶ ମଥୁରା ଜିଲ୍ଲା ବୃନ୍ଦାବନ ଯମୁନା ନଦୀରେ ଡଙ୍ଗା ଓଲଟି ୧୧ ଜଣଙ୍କ ମୃତ୍ୟୁ ହୋଇଛି ।ତେବେ ଅଘଟଣ ଘଟିବା ପୂର୍ବର ଏକ ଭିଡିଓ ବେଶ ଭାଇରାଲ ହେବାରେ ଲାଗିଛି । ଯେଉଁଥିରେ ଭକ୍ତମାନେ ଖୁସିର ସହ ରାଧେ ରାଧେ ଗାଉଥିଲେ । ହଠାତ ଡଙ୍ଗା ବୁଡ଼ିବାକୁ ଲାଗିଥିଲା । ଏହି ହୃଦୟସ୍ପର୍ଶୀ ଭିଡିଓ ଭାଇରାଲ ହେଉଥିବାବେଳେ ୟୁଜର୍ସମାନେ ବିଭିନ୍ନ କମେଣ୍ଟ କରୁଥିବା ଦେଖିବାକୁ ମିଳିଛି ।ଭିଡିଓରେ ଦେଖାଯାଇଛି କି,ଭକ୍ତମାନେ ଆନନ୍ଦରେ “ରାଧେ-ରାଧେ” ମନ୍ତ୍ର ଗାନ କରୁଥିଲେ, କିଛି ଭିଡିଓ କରୁଥିଲେ, ଅନ୍ୟମାନେ ତାଳି ବଜାଉଥିଲେ । ହଠାତ୍ ଡଙ୍ଗାଟି ହଲିବାକୁ ଲାଗିଲା, ଏବଂ ଲୋକମାନେ ଚିତ୍କାର କରିବାକୁ ଲାଗିଲେ। ଏହା କିଛି ସମୟ ପରେ ଓଲଟି ପଡ଼ିଲା, ଏବଂ ଲୋକମାନେ ନିଜକୁ ବଞ୍ଚାଇବା ପାଇଁ ପ୍ରୟାସ କରିଥିଲେ । ତଥାପି, କିଛି ଡଙ୍ଗା ଚାଳକଙ୍କ ସତର୍କତା ଯୋଗୁଁ କିଛି ଜୀବନ ବଞ୍ଚିଗଲା।୨୭ଜଣ ଶ୍ରଦ୍ଧାଳୁ ଯାଉଥିବାବେଳେ ୧୧ ଜଣଙ୍କ ମୃତ୍ୟୁ ହୋଇଛି । ଶେଷ ଖବର ସୁଦ୍ଧା ୪ ଜଣ ନିଖୋଜ ଥିଲେ । ବାକି ୧୨ ଜଣ ସୁରକ୍ଷିତଭାବେ ଉଦ୍ଧାର ହୋଇଥିବାବେଳେ ମେଡିକାଲରେ ଚିକିତ୍ସିତ ହେଉଛନ୍ତି ।ମୃତ୍ୟୁମୁଖରେ ଛାଡି ପଳାଇଯାଇଥିବା ଡଙ୍ଗା ମାଲିକ ପପୁ ନିଷାଦଙ୍କୁ ପୁଲିସ୍ ଗିରଫ କରିଛି।ଏହି ହୃଦୟବିଦାରକ ଦୁର୍ଘଟଣାରେ ଗୋଟିଏ ପରିବାରର ୭ ଜଣ ସଦସ୍ୟଙ୍କ ଅକାଳ ମୃତ୍ୟୁ ଘଟିଛି। ଏହି ସମସ୍ତ ଭକ୍ତ ପଞ୍ଜାବର ଲୁଧିଆନା ଜିଲ୍ଲାର ଜାଗ୍ରାଓଁରେ ଥିବା ଶ୍ରୀ ବାଙ୍କେ ବିହାରୀ କ୍ଲବ ପକ୍ଷରୁ ବୃନ୍ଦାବନ ଆସିଥିଲେ। ଏପ୍ରିଲ ୯ ତାରିଖରେ କ୍ଲବ ଦୁଇଟି ବସ୍ ଯୋଗେ ମୋଟ ୧୩୦ ଜଣ ଭକ୍ତଙ୍କୁ ଚାରି ଦିନିଆ ଧାର୍ମିକ ତୀର୍ଥଯାତ୍ରାରେ ବୃନ୍ଦାବନ ପଠାଇଥିଲା। ସମସ୍ତ ଭକ୍ତ ଶୁକ୍ରବାର ସକାଳେ ବୃନ୍ଦାବନରେ ପହଞ୍ଚିଥିଲେ । ଏବଂ ଦୁର୍ଘଟଣା ଅପରାହ୍ନ ୩ ଟା ସମୟରେ ଘଟିଥିଲା। ପ୍ରଶାସନ ଏପର୍ଯ୍ୟନ୍ତ ନିଖୋଜ ଲୋକଙ୍କ ସଠିକ୍ ସଂଖ୍ୟା ଗଣନା କରୁଛି।
