ବହୁଚର୍ଚ୍ଚିତ କୋଇଲା ବ୍ଲକ୍ ଆବଣ୍ଟନ ମାମଲାରେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କୁ ଆଶ୍ବସ୍ତି ମିଳିଛି । ତାଙ୍କ ବିରୋଧରେ ଚାଲୁଥିବା ଆପରାଧିକ ମାମଲାକୁ ବୁଧବାର ସୁପ୍ରିମକୋର୍ଟ ରଦ୍ଦ କରିଦେଇଛନ୍ତି । ସିବିଆଇ ଦାଖଲ କରିଥିବା କ୍ଲୋଜର ରିପୋର୍ଟକୁ ଗ୍ରହଣ କରି ସୁପ୍ରିମକୋର୍ଟ ମନମୋହନ ସିଂହ ଓ ଅନ୍ୟ ଅଭିଯୁକ୍ତମାନଙ୍କୁ ଏହି ମାମଲାରେ କ୍ଲିନ୍ ଚିଟ୍ ଦେଇଛନ୍ତି । ପ୍ରଧାନ ବିଚାରପତି ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଉଲ୍ଲେଖ କରିଛନ୍ତି ଯେ ସିବିଆଇ ଏହାର ତଦନ୍ତ ସମାପ୍ତ କରିବା ପରେ ଦୁଇଟି ପୃଥକ କ୍ଲୋଜର ରିପୋର୍ଟ ଦାଖଲ କରିଥିଲା, ଯାହାକୁ ସ୍ୱତନ୍ତ୍ର ବିଚାରପତି ଖାରଜ କରିଦେଇଥିଲେ। ଫଳସ୍ୱରୂପ, ସର୍ବୋଚ୍ଚ ଅଦାଲତ ୧୧ ମାର୍ଚ୍ଚ ୨୦୧୫ର ବିବାଦୀୟ ଆଦେଶକୁ ଖାରଜ କରି ସିବିଆଇର କ୍ଲୋଜର ରିପୋର୍ଟକୁ ଗ୍ରହଣ କରି ମାମଲାକୁ ବନ୍ଦ କରିଛନ୍ତି।
୧୧ ମାର୍ଚ୍ଚ ୨୦୧୫ରେ, ଏକ ସ୍ୱତନ୍ତ୍ର ସିବିଆଇ କୋର୍ଟ ସିବିଆଇର କ୍ଲୋଜର ରିପୋର୍ଟକୁ ଖାରଜ କରି ଦେଇଥିଲେ ଏବଂ ୨୦୦୫ ମସିହାରେ ତାଲାବିରା-୨ କୋଇଲା ବ୍ଲକ ଆବଣ୍ଟନ ସହିତ ଜଡିତ ଆଇପିସିର ଧାରା ୧୨୦-ବି ଅନୁଯାୟୀ ଅପରାଧିକ ଷଡ଼ଯନ୍ତ୍ର ଏବଂ ଧାରା ୪୦୯ ଅନୁଯାୟୀ ଅପରାଧିକ ବିଶ୍ୱାସ ଭଙ୍ଗ ଭଳି ଅପରାଧ ପାଇଁ ସ୍ୱର୍ଗତ ପୂର୍ବତନ ପ୍ରଧାନମନ୍ତ୍ରୀ ଡକ୍ଟର ମନମୋହନ ସିଂହ ଏବଂ ଅନ୍ୟ ପାଞ୍ଚ ଜଣଙ୍କୁ ସମନ ଜାରି କରିଥିଲେ। ସୁପ୍ରିମକୋର୍ଟ ୧ ଏପ୍ରିଲ ୨୦୧୫ରେ ଏହାର କାର୍ଯ୍ୟାନୁଷ୍ଠାନ ଉପରେ ରୋକ ଲଗାଇଥିଲେ।