ଚୌଦ୍ବାର ସର୍କଲ ଜେଲରୁ ଦୁଇ ଦୁର୍ଦ୍ଦାନ୍ତ ଅପରାଧୀ ଫେରାର ଘଟଣାରେ ନୂଆ ମୋଡ଼। ଜେଲ୍ ଡିଜି ସୁଶାନ୍ତ କୁମାର ନାଥ ଓ ଚୌଦ୍ବାର ସର୍କଲ ଜେଲ ଅଧୀକ୍ଷକ ସୁଜିତ କୁମାର ରାଉଳଙ୍କ ଅଡ଼ୁଆ ବଢିଛି। ଉଭୟଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣିଲେ ରାଜ୍ୟସଭା ସାଂସଦ ସୁଜିତ କୁମାର।ଉଭୟ ସରକାରୀ ପଦର ଅପବ୍ୟବହାର କରିଥିବା ନେଇ ସୁଜିତ କୁମାର ଚୌଦ୍ବାର ଥାନାରେ ଅନଲାଇନରେ ଲିଖିତ ଅଭିଯୋଗ ଦେଇଛନ୍ତି। ୨୦୨୫ ଅକ୍ଟୋବର ୩ରେ ଦଶହରା ସମୟରେ ୨ ବିହାରୀ ଅପରାଧୀ ରାଜା ସାହାଣୀ ଓ ମଧୁକାନ୍ତ ଚୌଦ୍ବାର ସର୍କଲ୍ ଜେଲ୍ ରୁ ଫେରାର ହୋଇଯାଇଥିଲେ। ବରିଷ୍ଠ ଜେଲ୍ ଅଧୀକ୍ଷକ ସୁଜିତ କୁମାର ରାଉଳଙ୍କ ବିରୋଧରେ ସରକାରୀ ଦସ୍ତାବିଜ ଜାଲିଆତି କରିବା ନେଇ ତତ୍କାଳୀନ ଜେଲର୍ ସନ୍ତୋଷିନୀ ଦାଶ ଚୌଦ୍ବାର ଥାନାରେ ଲିଖିତ ଅଭିଯୋଗ କରିବା ପରେ ହଟଚମଟ ସୃଷ୍ଟି ହୋଇଥିଲା।
ବିହାରୀ କଏଦୀ ଫେରାର୍ ଓ ଜେଲ ବିଭାଗରେ ହେଉଥିବା ବ୍ୟାପକ ଅନିୟମିତତା ପଛରେ ଜେଲ୍ ଅଧିକ୍ଷକଙ୍କ ସମେତ ଜେଲ DGଙ୍କ ହାତ ଥିବା ସନ୍ଦେହ କରି ଅନଲାଇନ୍ ଅଭିଯୋଗ ଦାଖଲ କରିଛନ୍ତି ରାଜ୍ୟସଭା ସାଂସଦ ସୁଜିତ୍ କୁମାର।