ଭୁବନେଶ୍ୱର,(ଓଡିଶା ଦର୍ପଣ): ରାଜ୍ୟର ଅଗ୍ରଣୀ ତଥା ନୟାଗଡ଼ ଜିଲ୍ଲାର ପଞ୍ଜିକୃତ ନାଟ୍ୟାନୁଷ୍ଠାନ ‘ନାଟ୍ୟଧାରା’ ଏବଂ ଜିଲ୍ଲା ସଂସ୍କୃତି ପରିଷଦର ମିଳିତ ଆନୁକୁଲ୍ୟରେ ଆସନ୍ତା ମାର୍ଚ୍ଚ ୧ ତାରିଖରୁ ୮ ତାରିଖ ଦୀର୍ଘ ୮ଦିନ ବ୍ୟାପି ରାଜ୍ୟସ୍ତରୀୟ ନାଟ୍ୟମେଳା ନୟାଗଡ଼ ଜିଲ୍ଲା ସଦର ମହକୁମା ସ୍ଥିତ ପଠାଣି ସାମନ୍ତ ଅଡିଟୋରିୟମ ଠାରେ ପ୍ରତ୍ୟହ ସନ୍ଧ୍ୟାରେ ଅନୁଷ୍ଠିତ ହେବ । ଏହି ଉପଲକ୍ଷେ ଏକ ପ୍ରସ୍ତୁତି ବୈଠକ ଆଜି ନୟାଗଡ଼ ସ୍ଥିତ ଶୁଭମ ଫାର୍ମ ହାଉସ, ମୁକ୍ତାପୁରଠାରେ ଅନୁଷ୍ଠିତ ହୋଇଯାଇଛି । ନାଟ୍ୟଧାରା ସଭାପତି ସମାଜସେବୀ ପ୍ରମୋଦ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ପ୍ରସ୍ତୁତି ବୈଠକରେ ଆସନ୍ତା ମାର୍ଚ୍ଚ ୧ ତାରିଖରୁ ୮ ଦିନଧରି ପ୍ରତ୍ୟେହ ସଂଧ୍ୟାରେ ଓଡ଼ିଶାର ବିଭିନ୍ନ ପ୍ରାନ୍ତରୁ ନାଟକମାନ ଅନୁଷ୍ଠିତ ହେବ ।
ଏହି କ୍ରମରେ ମାର୍ଚ୍ଚ ୧ତାରିଖରେ ନାଟ୍ୟ ଚେତନା ନାଟ୍ୟଗ୍ରାମ, ଖୋର୍ଦ୍ଧା ପକ୍ଷରୁ ନାଟକ ‘କୁଆଁକୁଆଁ’, ନବୀନ ବର୍ଣ୍ଣାଳୀ ଭୁବନେଶ୍ୱର ପକ୍ଷରୁ ନାଟକ ‘ଭିନ୍ନ ଏକ ଗଳ୍ପ’, ଓଡ଼ିଶା ନାଟକ ସମାରୋହ ବ୍ରହ୍ମପୁର ପକ୍ଷରୁ ନାଟକ ‘ସାଉଁଟା କଇଁ’, ପଞ୍ଚଧ୍ୱନୀ ନାଟ୍ୟ ପରିଷଦ, ଭୁବନେଶ୍ୱର ପକ୍ଷରୁ ‘ଗୋଟିଏ କାହାଣୀ’, ସୂତ୍ରଧର ଖୋର୍ଦ୍ଧା ପକ୍ଷରୁ ନାଟକ ‘ଆଉରଙ୍ଗଜେବ’, ମିରର ଥିଏଟର ବେଲପାହାଡ ପକ୍ଷରୁ ‘ଦୂର ଆକାଶ’, ରଙ୍ଗଶାଳା ପୁରୀ ପକ୍ଷରୁ ନାଟକ ‘ଶବ ବାହକମାନେ’ ଏବଂ ଶେଷରେ ନୟାଗଡ଼ ଚମତ୍କାର ନାଟ୍ୟାନୁଷ୍ଠାନ ପକ୍ଷରୁ ନାଟକ ‘ନିଧି ବାବୁ ଘରେ ଅଛ’ ମଞ୍ଚସ୍ଥ ହେବ ।
ଗତ ୨ବର୍ଷ ଧରି ନାଟ୍ୟଧାରା ଦ୍ୱାରା ଆୟୋଜିତ ସପ୍ତାହବ୍ୟାପୀ ନାଟକ କାର୍ଯ୍ୟକ୍ରମର ବିପୁଳ ସଫଳତା ଚଳିତବର୍ଷ ପୁନର୍ବାର ନାଟକ ମହୋତ୍ସବ ଆୟୋଜନ କରିବା ପାଇଁ ପ୍ରେରଣା ଯୋଗାଇଛି ବୋଲି ନାଟ୍ୟଧାରା ପକ୍ଷରୁ ନାଟ୍ୟ ନିର୍ଦ୍ଦେଶକ ଡ.ବିଜୟ କୁମାର ଚୌଧୁରୀ ପ୍ରକାଶ କରିବା ସହ ଚଳିତବର୍ଷ ନାଟକ କାର୍ଯ୍ୟକ୍ରମର ସଂପୂର୍ଣ୍ଣ ତଥ୍ୟ ପ୍ରଦାନ କରିଥିଲେ । ଅନୁଷ୍ଠାନର ସଂପାଦକ ଲକ୍ଷ୍ମୀଧର ମହାପାତ୍ରଙ୍କ ପ୍ରତ୍ୟକ୍ଷ ତତ୍ୱାବଧାନରେ ଅନୁଷ୍ଠିତ ଏହି ପ୍ରସ୍ତୁତି ବୈଠକରେ ଅନ୍ୟମାନଙ୍କ ମଧ୍ୟରେ ନାଟ୍ୟ ନିର୍ଦ୍ଦେଶକ ଡ.ଆଶୁତୋଷ ମିଶ୍ର, ସାହିତ୍ୟିକ ନିର୍ମଳ ଶୂରଦେଓ, କଣ୍ଠଶିଳ୍ପୀ ପ୍ରଶାନ୍ତ କୁମାର ଦାଶ, ଶେଖ ଅବଦୁଲ ଖାଲିକ, ଅଶୋକ ମଲ୍ଲ, ଲକ୍ଷ୍ମୀଧର ସାହୁ, ଉମାକାନ୍ତ ମିଶ୍ର, କଣ୍ଠଶିଳ୍ପୀ ନବକିଶୋର ମିଶ୍ର, ଅଧ୍ୟାପକ ଗଣେଶ ମିଶ୍ର, ସୁଧାଶୁଂ ଶେଖର ପଣ୍ଡା, ରଜତ ପଟ୍ଟନାୟକ, ସରୋଜ ସାହୁ, ଗୋକୁଳ ଷଡ଼ଙ୍ଗୀ, ରଂଜନ ରଶ୍ମୀ ଜେନା ପ୍ରମୁଖ କର୍ମକର୍ତ୍ତା ଏବଂ ସଦସ୍ୟମାନେ ଯୋଗଦାନ କରିଥିଲେ ।
