ନାଟକ ମହୋତ୍ସବର ଅନ୍ତିମ ସନ୍ଧ୍ୟା, ମଞ୍ଚସ୍ଥ ହେଲା ନାଟକ ‘ଡାଆଣି’

ନୟାଗଡ଼,(ଓଡ଼ିଶା ଦର୍ପଣ): ଜିଲ୍ଲାର ଅଗ୍ରଣୀ ନାଟ୍ୟାନୁଷ୍ଠାନ ‘ନାଟ୍ୟଧାରା’ ପକ୍ଷରୁ ଚାଲିଥିବା ଷଷ୍ଠ ରାଜ୍ୟସ୍ତରୀୟ ନାଟକ ମହୋତ୍ସବର ଅନ୍ତିମ ଦିବସରେ ‘ଚମତ୍କାର ନାଟ୍ୟାନୁଷ୍ଠାନ’, ନୟାଗଡ଼ ପକ୍ଷରୁ ଜୀବନ ଓ ଅନ୍ଧବିଶ୍ୱାସର ନାଟକ ‘ଡାଆଣି ’ ସଫଳତାର ସହ ପଠାଣି ସାମନ୍ତ ପ୍ରେକ୍ଷାଳୟରେ ମଞ୍ଚସ୍ଥ ହୋଇଯାଇଛି। ଆଦିବାସୀ ପରମ୍ପରା ଓ ସେମାନଙ୍କ ଜୀବନଶୈଳୀକୁ ଆଧାର କରି ନିର୍ମିତ ଏହି ନାଟକଟି ସମାଜରେ ପ୍ରଚଳିତ କୁସଂସ୍କାର ବିରୁଦ୍ଧରେ ଏକ ଶାଣିତ ସ୍ୱର ଉତ୍ତୋଳନ କରିଛି। ନାଟକଟି ଆଦିବାସୀ ସମାଜର ସରଳତା ଏବଂ ସେମାନଙ୍କର ପ୍ରକୃତି ସହ ଥିବା ନିବିଡ଼ ସମ୍ପର୍କକୁ ଦର୍ଶାଇଛି।

କାହାଣୀର ମୁଖ୍ୟ ଚରିତ୍ର ‘ଭଗିଆ’ ଓ ତା’ର ପତ୍ନୀ ‘ନୁନୀ’ କିଭଳି ଜଣେ ଶଠ ସରପଞ୍ଚ,ଚରିତ୍ରହୀନ ପୋଲିସ ଅଧିକାରୀ ଓ ଠକ ଠିକାଦାରଙ୍କ ଚକ୍ରାନ୍ତର ଶିକାର ହେଉଛନ୍ତି, ତାହା ଅତ୍ୟନ୍ତ ମର୍ମସ୍ପର୍ଶୀ। ଦାଦନ ଖଟିବାକୁ ଯାଇ ଭଗିଆର ମୃତ୍ୟୁ ପରେ, ଗବେଷଣା ପାଇଁ ଆସିଥିବା ଡକ୍ଟର ଚୌଧୁରୀ ଭଗିଆର ରୂପ ଧରି ସେହି ପରିବାରକୁ ସାହାଯ୍ୟ କରିବା ପାଇଁ ଆଗେଇ ଆସୁଛନ୍ତି। ତେବେ ଠିକାଦାରଙ୍କ ଦ୍ୱାରା ନିର୍ଯାତିତା ନୁନୀକୁ ସମାଜ କିଭଳି ‘ଡାହାଣୀ’ ଆଖ୍ୟା ଦେଇ ଅନ୍ଧବିଶ୍ୱାସର କଠୋର ଦଣ୍ଡ ଦେଉଛି, ତାହା ଏହି ନାଟକର ମୁଖ୍ୟ ଆକର୍ଷଣ। ଅନ୍ଧବିଶ୍ୱାସର ଜାଲରେ ଛନ୍ଦି ହୋଇଥିବା ଆଦିବାସୀ ସମାଜ କିଭଳି ଜଣେ ନିଷ୍ପାପ ନାରୀକୁ ନିର୍ଯାତନା ଦେଉଛି ଏବଂ ଶେଷରେ ସତ୍ୟର କିଭଳି ବିଜୟ ହେଉଛି, ତାହା ‘ଡାହାଣୀ’ ନାଟକ ମାଧ୍ୟମରେ ସୁନ୍ଦର ଭାବେ ଉପସ୍ଥାପନ କରାଯାଇଛି। ନାଟକକୁ ଜୀବନ୍ତ କରିଥିବା କଳାକାର ରାକେଶ ଦାସ, ଲକ୍ଷ୍ମୀଧର ମହାପାତ୍ର, ଉମାଶଙ୍କର ମିଶ୍ର, ଜିତେନ୍ଦ୍ର ଚୌଧୁରୀ, ପ୍ରଦୀପ୍ତ ଡାକୁଆ, ନୀଳକଣ୍ଠ ଦାଶ, ନିଶିକାନ୍ତ ମହାପାତ୍ର,ବିନୋଦ କୁମାର ସାହୁ,ଶାଶ୍ୱତ ମିଶ୍ର, ବାଲୁଙ୍କେଶ୍ୱର ବିଶୋଇ, ପ୍ରଶାନ୍ତ କୁମାର ଖଟୁଆ, ଦେବାଶିଷ ମହାପାତ୍ର, ପ୍ରହଲ୍ଲାଦ ପ୍ରଧାନ, ଦିଲ୍ଲୀପ ପ୍ରଧାନ,ସୋମନାଥ ସାହୁ ସୋନାଲୀ ଶୁଚିସ୍ମିତା, ଅଭିନାଶା, ସନ୍ତୋଷିନୀ ମଲ୍ଲିକ ଏବଂ ଦିବ୍ୟଜ୍ୟୋତି ପଟ୍ଟନାୟକ ପ୍ରମୁଖ ନିଜର ଚମତ୍କାର ଅଭିନୟ ପ୍ରଦର୍ଶନ କରି ଦର୍ଶକଙ୍କୁ ବିଭୋର କରିଥିଲେ ।

ନାଟ୍ୟକାର ବିଜୟ ମହାନ୍ତିଙ୍କ ଦ୍ୱାରା ଲିଖିତ ଏହି ନାଟକକୁ ନାଟ୍ୟଭୂଷଣ ଡ.ବିଜୟ କୁମାର ଚୌଧୁରୀ ନିର୍ଦ୍ଦେଶନା ଦେଇଥିଲେ।ନାଟକଟିକୁ ସଙ୍ଗୀତରେ ଶକ୍ତି ମିଶ୍ର ସଜାଇ ଥିବା ବେଳେ
ଆଲୋକରେ ବିକାଶ ପ୍ରଧାନ ଏବଂ ମଞ୍ଚ ପରିଚାଳନାରେ ପ୍ରଶାନ୍ତ ସ୍ୱାଇଁ (ପାଣ୍ଡିଆ) ନିଜର ଦକ୍ଷତା ପ୍ରତିପାଦନ କରିଛନ୍ତି। ନାଟକ ପ୍ରାରମ୍ଭରେ ଅନୁଷ୍ଠିତ ଉଦଘାଟନୀ ସଭାରେ ମୁଖ୍ୟ ଅତିଥି ଭାବେ ନୟାଗଡ଼ ବିଧାୟକ ଡ. ଅରୁଣ କୁମାର ସାହୁ ଯୋଗଦାନ କରିଥିବା ବେଳେ ବିଶିଷ୍ଟ ଅତିଥି ଭାବେ ଜିଲ୍ଲା ପରିଷଦ ଅଧ୍ୟକ୍ଷ ଇଂ ଦେବାଶିଷ ପଟ୍ଟନାୟକ ଯୋଗଦାନ କରି ‘ନାଟ୍ୟଧାରା’ର ଉଦ୍ୟମକୁ ବେଶ ପ୍ରଶଂସା କରିଥିଲେ। ଏହି ଅବସରରେ ବରିଷ୍ଠ ସଂକୀର୍ତ୍ତନ ଗାୟକ ଅନ୍ତର୍ଯ୍ୟାମୀ ନାୟକ ଏବଂ ନାରାୟଣ ଚିତ୍ରାଳୟର ନାରାୟଣ ସାହୁଙ୍କୁ ସମ୍ବର୍ଦ୍ଧିତ କରାଯାଇଥିଲା।