ଅରୁଣାଚଳ ପ୍ରଦେଶର ଦିବାଙ୍ଗ ଭ୍ୟାଲି ଜିଲ୍ଲାରେ ପ୍ରବଳ ବର୍ଷା ଯୋଗୁଁ ସୃଷ୍ଟି ହୋଇଛି ବନ୍ୟା। ଏହି ସମୟ ଦୁଇଟି ସେଲ୍ଟର ହୋମ୍ ଭାସିଯିବା କାରଣରୁ ସେନାର ୫ ଯବାନ ନିଖୋଜ ହୋଇଯାଇଛନ୍ତି। ସେଭଳି ଉପର ସୁବାନସିରି ଜିଲ୍ଲାରେ ଏକ ରାସ୍ତା ନିର୍ମାଣ ସ୍ଥାନରେ ଭୂସ୍ଖଳନ ଯୋଗୁଁ ୪ ଜଣଙ୍କର ମୃତ୍ୟୁ ହୋଇଥିବାର ଖବର ମିଳିଛି। ଖବର ମୁତାବକ, ଦିବାଙ୍ଗ ଘାଟି ଜିଲ୍ଲାର ପସୁ ପାନି ସେନା ଶିବିରରେ ଥିବା ୫ମ ଗ୍ରେନେଡିୟର୍ସର ଦୁଇଟି ଆଶ୍ରୟସ୍ଥଳୀ ବନ୍ୟାରେ ସମ୍ପୂର୍ଣ୍ଣ ଧୋଇଯାଇଛି। ବନ୍ୟା ଯୋଗୁଁ କ୍ୟାମ୍ପରେ ଥିବା ମୋଟ ୭ ଜଣ ସେନା କର୍ମଚାରୀ ଭାସି ଯାଇଥିବା ବେଳେ ୨ ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଥିବା ବେଳେ ବାକି ୫ ଜଣଙ୍କର ଏପର୍ଯ୍ୟନ୍ତ କୌଣସି ସନ୍ଧାନ ମିଳିନାହିଁ । ନିଖୋଜ ସୈନିକମାନେ ହେଲେ ହାବିଲଦାର ଉପେନ୍ଦ୍ର, କୁନ୍ଦନ, ବିନୋଦ, ଆଦିତ୍ୟ ଏବଂ ସମୁନ୍ଦା । ସେମାନଙ୍କୁ ଖୋଜିବା ପାଇଁ ITBP, BRO ଏବଂ ସ୍ଥାନୀୟ ପୋଲିସ ପକ୍ଷରୁ ମିଳିତ ଭାବେ ଏକ ବଡ଼ ଧରଣର ସର୍ଚ୍ଚ ଅପରେସନ ଜାରି ରହିଛି ।
ସୁବନସିରି ଜିଲ୍ଲାରେ ଏକ ପାହାଡ଼ ମଝିରେ ରାସ୍ତା ନିର୍ମାଣ କାମ ଚାଲିଥିବା ବେଳେ ହଠାତ୍ ଭୂସ୍ଖଳନ ହୋଇଥିଲା । ଫଳରେ ସେଠାରେ କାର୍ଯ୍ୟରତ ୪ ଶ୍ରମିକ ମାଟି ଓ ପଥର ତଳେ ଚାପି ହୋଇ ପ୍ରାଣ ହରାଇଛନ୍ତି । ଏହି ସମୟରେ, ନାଚୋ ପୋଲିସ ଷ୍ଟେସନର କର୍ମଚାରୀମାନଙ୍କୁ ସନ୍ଧାନ ଏବଂ ଉଦ୍ଧାର କାର୍ଯ୍ୟ ପାଇଁ ନିୟୋଜିତ କରାଯାଇଛି। ଦାପୋରିଜୋରୁ ଅଗ୍ନିଶମ ଏବଂ ଜରୁରୀକାଳୀନ ସେବା କର୍ମଚାରୀମାନଙ୍କୁ ମଧ୍ୟ ପଠାଯାଇଛି। ସେଭଳି ରାଜ୍ୟ ବିପର୍ଯ୍ୟୟ ପ୍ରତିକ୍ରିୟା ବାହିନୀ (SDRF) ର ଏକ ଦଳ ଏହି କାର୍ଯ୍ୟରେ ସହାୟତା କରୁଛି ।