ଦୀର୍ଘ ଦିନର ଅପେକ୍ଷା ପରେ ବଡ଼ ପରଦାକୁ ଆସିଛି ୟଶଙ୍କ ବହୁ ପ୍ରତୀକ୍ଷିତ ଫିଲ୍ମ ‘Toxic’। ୟଶଙ୍କ ଆକ୍ସନ୍ ଅବତାର ସାଙ୍ଗକୁ ଫିଲ୍ମର ବିପୁଳ ବଜେଟ୍ ଏବଂ ହାଇପ୍କୁ ନେଇ ଦର୍ଶକଙ୍କ ମଧ୍ୟରେ ଭଲ ଉତ୍ସାହ ରହିଥିଲା । ତେବେ ଫିଲ୍ମ ଦେଖିବା ପରେ ସେହି ଉତ୍ସାହ ନିରାଶାରେ ପରିଣତ ହୋଇଥିବା ସୋସିଆଲ ମିଡିଆରେ ଚର୍ଚ୍ଚା ହେଉଛି ।ଫିଲ୍ମକୁ ନେଇ ଅଧିକାଂଶ ବ୍ୟାଡ୍ ରିଭ୍ୟୁ ଥିଲେ ବି ଆଡଭାନ୍ସ ବୁକିଂରେ ଫିଲ୍ମ ଜବରଦସ୍ତ ରେସ୍ପନ୍ସ ପାଇଛି । ରିପୋର୍ଟ ଅନୁସାରେ, ‘ଟକ୍ସିକ୍’ ଆଡଭାନ୍ସ ବୁକିଂରୁ ପ୍ରାୟ ୯୦ କୋଟି ଟଙ୍କା ଆୟ କରିସାରିଛି। ଫିଲ୍ମରେ ୟଶଙ୍କୁ ଡବଲ୍ ରୋଲ୍ରେ ଦେଖିବାକୁ ମିଳିବ । ତାଙ୍କ ସହ କିଆରା ଆଡଭାଣୀ, ନୟନତାରା, ତାରା ସୁତାରିଆ, ରୁକ୍ମିଣୀ ବସନ୍ତ ଏବଂ ହୁମା କୁରେଶୀ ପ୍ରମୁଖ ଭୂମିକାରେ ଅଭିନୟ କରିଛନ୍ତି । ଗୀତୁ ମୋହନଦାସ ଏହି ଫିଲ୍ମର ନିର୍ଦ୍ଦେଶନା ଦେଇଥିବାବେଳେ ଗୀତୁ ଏବଂ ୟଶ ମିଶି ଫିଲ୍ମର କାହାଣୀ ଲେଖିଛନ୍ତି । କନ୍ନଡ଼ ଓ ଇଂରାଜୀ ଭାଷାରେ ନିର୍ମିତ ‘ଟକ୍ସିକ୍’ ହିନ୍ଦୀ, ତାମିଲ୍ ଏବଂ ତେଲୁଗୁ ଭାଷାରେ ମଧ୍ୟ ରିଲିଜ୍ ହୋଇଛି । ‘ଟକ୍ସିକ୍: ଏ ଫେୟାରିଟେଲ୍ ଫର୍ ଗ୍ରୋନ୍-ଅପ୍ସ’ ନାମରେ ପରିଚିତ ଏହି ଫିଲ୍ମ ୧୯୫୦ ଦଶକର ଗୋଆ ପୃଷ୍ଠଭୂମିରେ ଗଢ଼ିଉଠିଛି । ଅପରାଧ ଦୁନିଆକୁ ନେଇ ଏହା ଏକ ହିଂସାତ୍ମକ ପ୍ରତିଶୋଧର କାହାଣୀ । ଫିଲ୍ମଟି ପ୍ରଥମେ ମାର୍ଚ୍ଚରେ ରିଲିଜ୍ ହେବାର ଥିଲା । ଫିଲ୍ମଟିକୁ ନେଇ ଦୀର୍ଘ ଦିନ ଧରି ଚର୍ଚ୍ଚା ଚାଲିଥିଲା। ବିଶେଷ କରି ‘KGF’ ପରେ ୟଶ୍ କିଭଳି ନୂଆ ରୂପରେ ଦର୍ଶକଙ୍କ ସାମ୍ନାକୁ ଆସିବେ, ତାହା ଜାଣିବାକୁ ଫ୍ୟାନ୍ମାନେ ଅପେକ୍ଷା କରିଥିଲେ । ଅନ୍ୟପଟେ ନିର୍ଦ୍ଦେଶିକା ଗୀତୁ ମୋହନଦାସଙ୍କ ପୂର୍ବ ଫିଲ୍ମଗୁଡ଼ିକ ଯୋଗୁଁ ମଧ୍ୟ ‘Toxic’କୁ ନେଇ କ୍ୟୁରିଓସିଟି ଥିଲା ।
ମର୍ଣ୍ଣିଂ ଶୋ’ରେ ମଧ୍ୟ ଭଲ ସଂଖ୍ୟାରେ Gen Z ଦର୍ଶକ ସିନେମା ହଲ୍ରେ ପହଞ୍ଚିଥିଲେ। ଫିଲ୍ମ ଆରମ୍ଭ ହେବା ପରେ ୟଶଙ୍କ ଏଣ୍ଟ୍ରି ନିଶ୍ଚିତ ଭାବେ ଦର୍ଶକଙ୍କ ଧ୍ୟାନ ଆକର୍ଷଣ କରିଥିଲା । ତାଙ୍କ ଷ୍ଟାରଡମ୍ ଏବଂ ଆକ୍ସନ୍ରେ ଦମ୍ ଦେଖିବାକୁ ମିଳିଥିଲା। କିନ୍ତୁ ଏହା ପରେ ଫିଲ୍ମର କାହାଣୀ ଓ ସ୍କ୍ରିନ୍ପ୍ଲେ ଦର୍ଶକଙ୍କୁ ନିରାଶ କରିଥିବା ଭଳି ଲାଗିଛି । କିଆରା ଆଡଭାଣୀଙ୍କ ଅଭିନୟ ମଧ୍ୟ ଆଶା ଅନୁସାରେ ପ୍ରଭାବ ପକାଇପାରିନଥିବା କୁହାଯାଉଛି ।
ଫିଲ୍ମରେ ଆକ୍ସନ୍ର ଅଭାବ ନାହିଁ । ଗୁଳି ବର୍ଷୁଛି, ଲଢ଼େଇ ଚାଲିଛି ଏବଂ ୟଶ୍ ନିଜ ଷ୍ଟାର ପାୱାର୍ରେ ପରଦାକୁ ଦଖଲ କରିଛନ୍ତି । ହେଲେ ଆକ୍ସନ୍ ସିନ୍ଗୁଡ଼ିକରେ ଯେଉଁ ‘ମାସ୍ ମୋମେଣ୍ଟ’ ଏବଂ ଦର୍ଶକଙ୍କ ତାଳି-ସିଟି ଆଶା କରାଯାଉଥିଲା, ତାହା ବେଶ୍ କମ୍ ଅନୁଭବ ହୋଇଛି । ଏପରିକି ମର୍ଣ୍ଣିଂ ଶୋ’ରେ ଦର୍ଶକଙ୍କ ଏକ ବଡ଼ ଅଂଶ ପରଦା ବଦଳରେ ମୋବାଇଲ୍ରେ ବ୍ୟସ୍ତ ଥିବା ସୋସିଆଲ ମିଡିଆରେ କୁହାଯାଉଛି । ତିନି ଘଣ୍ଟାରୁ ଅଧିକ ସମୟର ଫିଲ୍ମ ହୋଇଥିବାରୁ ଲୋକେ ବୋର ହେଉଛନ୍ତି ।
