ଗୃହରେ MMDR ଝଡ଼ ମଧ୍ୟରେ ଖଣି ଓ ଇସ୍ପାତ ମନ୍ତ୍ରୀଙ୍କ ଉତ୍ତର । ଖଣିରୁ ଆଦାୟ ହୋଇଥିବା ରାଜସ୍ୱର ହିସାବ ଦେଲେ ମନ୍ତ୍ରୀ ବିଭୂତି ଜେନା । ବିଜେଡି ବିଧାୟକ ଧ୍ରୁବ ଚରଣ ସାହୁଙ୍କ ଲିଖିତ ପ୍ରଶ୍ନରେ ଖଣି ରାଜସ୍ୱ ଓ ରୟାଲିଟି ସମ୍ପର୍କରେ ତଥ୍ୟ ମଗାଯାଇଥିଲା। ୨୪ ସେପ୍ଟେମ୍ବର ୨୦୨୬ ପାଇଁ ପ୍ରକାଶିତ ବିଧାନସଭାର ଲିଖିତ ପ୍ରଶ୍ନାବଳୀରେ ଏହା ପ୍ରଶ୍ନ ନମ୍ବର ୯୫୨ ଭାବେ ରହିଛି।ଇସ୍ପାତ ଓ ଖଣି ବିଭାଗର ମନ୍ତ୍ରୀ ବିଭୂତି ଭୂଷଣ ଜେନାଙ୍କ ଉତ୍ତର ଅନୁଯାୟୀ, ୨୦୧୬-୧୭ ଆର୍ଥିକ ବର୍ଷରେ ଖଣି କ୍ଷେତ୍ରରୁ ୭ ହଜାର ୩୨୮ କୋଟି ଟଙ୍କା ରାଜସ୍ୱ ଆଦାୟ ହୋଇଥିଲା। ୨୦୧୭-୧୮ରେ ଏହା ୭ ହଜାର ୮୯୮ କୋଟି ଟଙ୍କା ଥିବାବେଳେ ୨୦୧୮-୧୯ରେ ବଢ଼ି ୧୩ ହଜାର ୧୧୩ କୋଟି ଟଙ୍କାରେ ପହଞ୍ଚିଥିଲା। ବିଭୂତି ଭୂଷଣ ଜେନା ବର୍ତ୍ତମାନ ଇସ୍ପାତ ଓ ଖଣି ବିଭାଗର ମନ୍ତ୍ରୀ ଥିବା ରାଜ୍ୟ ସରକାରଙ୍କ ଅଧିକୃତ ୱେବସାଇଟ୍ରେ ଉଲ୍ଲେଖ ରହିଛି।
୨୦୧୯-୨୦ରେ ରାଜସ୍ୱ ଆଦାୟ ୧୪ ହଜାର ୧୧୫ କୋଟି ଟଙ୍କା ଓ ୨୦୨୦-୨୧ରେ ୧୬ ହଜାର ୪୪୭ କୋଟି ଟଙ୍କା ଥିଲା। ତେବେ ୨୦୨୧-୨୨ରେ ଏଥିରେ ବଡ଼ ବୃଦ୍ଧି ଦେଖାଯାଇ ଆଦାୟ ୫୫ ହଜାର ୨୨୧ କୋଟି ଟଙ୍କାରେ ପହଞ୍ଚିଥିଲା। ଦିଆଯାଇଥିବା ୧୦ ବର୍ଷର ତଥ୍ୟ ମଧ୍ୟରେ ଏହା ସର୍ବାଧିକ।ସେହିପରି ୨୦୨୨-୨୩ରେ ୪୨ ହଜାର ୧୮୮ କୋଟି, ୨୦୨୩-୨୪ରେ ୫୦ ହଜାର ୯୮୦ କୋଟି, ୨୦୨୪-୨୫ରେ ୪୬ ହଜାର ୭୮୬ କୋଟି ଏବଂ ୨୦୨୫-୨୬ରେ ୫୧ ହଜାର ୧୨୭ କୋଟି ଟଙ୍କା ରାଜସ୍ୱ ଆଦାୟ ହୋଇଛି।ଚଳିତ ୨୦୨୬-୨୭ ଆର୍ଥିକ ବର୍ଷରେ ୧୫ ସେପ୍ଟେମ୍ବର ପର୍ଯ୍ୟନ୍ତ ୨୩ ହଜାର ୭୬୯ କୋଟି ଟଙ୍କା ରାଜସ୍ୱ ଆଦାୟ ହୋଇଥିବା ତଥ୍ୟ ଦିଆଯାଇଛି।